Міжнародны дзень роднай мовы адзначаецца 21 лютага. З гэтай нагоды лідар беларускіх дэмакратычных сіл Святлана Ціханоўская звярнулася да беларусаў. Відэа апублікавана на яе YouTube-канале.
«Яшчэ тры гады таму я сама не вельмі ўпэўнена пачувалася, калі размаўляла на беларускай мове. Вы, дарагія мае, натхнялі мяне, дапамагалі, матывавалі», — сказала Ціханоўская.
Яна дадала, што яе цешыць, што сёння жаданне вучыць беларускую мову з’яўляецца не толькі ў дарослых, але і ў дзяцей.
«Цяпер і мая дачка Агнія вывучае новыя словы, спрабуе размаўляць па-беларуску і нават чытае пакрысе. Ёй вельмі падабаюцца рыфмаванкі Юрыя Несцярэнкі з кніжкі „Неверагодны свет“, вершыкі Андрэя Скурко, а таксама гісторыі з „Ашуканак“ Яны Вольскай», — падзялілася Святлана Ціханоўская.
Таксама яна нагадала, што «беларуская мова — наш унікальны пароль, які ведаем толькі мы з вамі».
«Захоўвайце родную мову, аберагайце, перадавайце дзецям. Бо пакуль жыве наша мова, будзе жыць і нашая нацыя», — сказала яна.
Нагадаем, што, па даных апошняга перапісу 2019 года, у Беларусі пражывалі 9,41 мільёна чалавек. З іх 84,9% (ці 7,99 мільёна) назвалі сябе беларусамі. Толькі 61,2% апытаных (ці 5,95 мільёна) лічаць сваёй роднай мовай беларускую. Аднак дома на ёй размаўляюць яшчэ менш — толькі 2,4 мільёна.